06 september, 2007

Píanóið mitt

Mamma og pabbi gáfu mér nýtt og fínt píanó.. minnir að það hafi verið þegar ég var í kringum 15 ára aldurinn. Síðan þá hefur það fylgt mér í allar mínar íbúðir í Reykjavík, og þær hafa nú verið nokkrar. Eitt eða tvö sumur var það m.a.s. geymt heima hjá Svenna frænda í Karfavoginum til að forða því frá flutningum á milli landshluta. Mest var mér þó blótað þegar ég flutti með það í litlu sætu risíbúðina mína, en upp í hana lá mjór stigi í sveigjum. Fjórir fílefldir píanóflutningamenn fóru grátandi frá mér daginn þann. Ekki var gleði þeirra mikil þegar ég hringdi í þá rúmum tveimur árum síðar og bað þá vinsamlegast að bera það niður aftur. Vanir menn og allt það!
Núna erum við búin að vera píanólaus í allt sumar, enda hefur íbúðin ekki verið við hæfi virðulegs hljóðfæris fyrr en nýlega. Stóri dagurinn rann svo upp á mánudaginn, en þá var það borið í hús með mikilli viðhöfn við almennan fögnuð heimilisfólks (aðallega móður og miðjubarns). Að sjálfsögðu var það tekið inn um forsetasvalirnar á annarri hæð, annað væri vart við hæfi. Myndir segja meira en mörg orð:
Alrei hefur píanóið mitt komist jafn örugglega jafn hátt upp með jafnlítilli fyrirhöfn. Vantar reyndar mynd af risakrananum sem sá um verkið...
(Mér telst svo til að píanóið mitt verið í 8 íbúðum eftir að það flutti með mér til Reykjavíkur)

4 ummæli:

Birgitta sagði...

Vá hvað þú ert búin að vera dugleg að blogga! Er námsefnið virkilega svoooona leiðinlegt? Bíð spennt eftir því að þú komir heim úr skólanum og kjaftir aðeins við mig ;).
Knús

Nafnlaus sagði...

Sá glitta í þessar fínu súlur undir píanóinu fljúgandi! Skyldi Geiri vita af þessu?

Syngibjörg sagði...

Ég hefði ekki getað horft á og hvað þá tekið myndir. Og er tónlistarherbergið tilbúið?

Nafnlaus sagði...

Var meistari Steini að verki við flutningana? Ég fæ engan annan til að flytja mitt píanó - og hef einmitt fylgst skjálfandi á beinununum með því svífa yfir trjátoppa á leið inn og út um svaladyr...